From the Website of PRWC CPP-NPA-NDF
Article links: https://philippinerevolution.nu/angbayan/presensyang-militar-ng-us-sa-pilipinas-maaring-magpasiklab-ng-gerang-nukleyar/
Presensyang militar ng US sa Pilipinas, maaring magpasiklab ng gerang nukleyar
Sa
pamamagitan ng presensya ng tropa, gamit militar at nukleyar na arsenal
nito sa Pilipinas, inilalagay ng US ang buong rehiyong Asia sa “bingit
ng isang nukleyar na Armageddon.” Ito ang babala ni Prof. Roland
Simbulan sa isang webinar na pinamagatang “Countercurrents: Foreign
Policies and Anti-imperialist Struggle na inilunsad noong Pebrero 4. Si
Simbulan ay isang propesor sa University of the Philippines at
pangalawang pangulo ng Center for People’s Empowerment in Governance.
“Imbwelto
ang Pilipinas sa mahigpit na kumpetisyon sa pagitan ng US at China
dahil sa lokasyong geopulitikal nito,” aniya. Matagal nang bahagi ang
bansa sa “imprastrukturang nukleyar” ng US, na nagsisilbing daungan ng
malalaking barkong pandigma na nagdadala ng mga armas nukleyar at
pinatatakbo ng enerhiyang nukleyar. “Bahagi na tayo (Pilipinas) ng
opensibong first island chain ng pagkubkob sa China dahil sa Mutual
Defense Treaty, Visiting Forces Agreement at ng Enhanced Defense
Cooperation Agreement,” aniya.
Sa pamamagitan ng mga tratado at
kasunduang ito, napanatili ng US ang hegemonyang militar ng US sa
Pilipinas, kahit wala na itong minamantineng malalaking permanenteng
base militar sa bansa.
“Matagal nang itinuturing ng US na krusyal
na lokasyon ang Pilipinas para sa sarili nitong pangmatagalang
seguridad,” ayon kay Prof. Simbulan. Tinawag niyang “muog ng US” ang
Pilipinas sa Asia na nagsisilbing lunsaran ng mga operasyong pandagat at
panghimpapawid hindi lamang sa South China Sea, kundi sa buong
Asia-Pacific at Middle East.
Ang kontrol ng US at “bakal na
ugnayan” nito sa Pilipinas ay hindi nauga at lalong di natumbasan ng
pakikipagmabutihan at pagkukunwari ng nagdaang presidente na si Rodrigo
Duterte na pagpaling nito sa China.
Katunayan, humigpit pa ang
hawak ng US sa Pilipinas sa termino ni Duterte. Isinagawa sa ilalim ng
kanyang termino ang luma at bagong malalaking pagsasanay-miliatr. Sa
ilalim din niya nagsimula ang “renegosasyon” ng EDCA at MDT para bigyan
ng dagdag na mga pribiliheyo at ekstra-teritoryal na mga karapatan ang
US sa bansa. Nagsimula din habang presidente pa siya ang negosasyon para
gamitin ng Cerberus, isang kumpanyang Amerikano, ang naluging Hanjin
Shipyard sa Subic para sa pagkukumpuni, pag-refuel at pagdaong ng US
Navy.
Sa ilalim ng rehimeng Marcos Jr, sunud-sunod ang pagbisita
ng matatas na upisyal at upisyal-militar ng US sa Pilipinas. Noong
Nobyembre 2022, lumapag si US Vice President Kamala Harris para pormal
na ipabatid ang intensyon ng US na dagdagan ng lima pang kampo ng AFP
para itayo ang mga pasilidad ng US para sa mga tropa at gamit militar
nito sa Pilipinas. Sinundan ito ng pagbisita ni Lloyd Austin, kalihim ng
State Department ng US noong Pebrero 2.
Naipirmi sa mga
pagbisitang ito ang pagpapabilis sa konstruksyon sa unang limang base
militar ng US sa bansa na gagastusan ng \$100 milyon, at ang pagdagdag
na apat pang lokasyong maaaring lagakan ng kanilang tropa at armas. Ang
mga lokasyong ito ay nagbibigay sa US ng bentahe para sa mabilis na
paglulunsad ng mga operasyon sakaling magkaroon ng tunggalian sa Taiwan o
habang nagsasagawa ang US Navy ng mapanghamong mga “operasyon sa
malayang paglalalayag” sa South China Sea.
Pang-uupat ng gera
Noong
Pebrero 4, dumating sa Pilipinas ang mataaas na upisyal-miltiar ng US
para ipinalisa ang plano para sa paglulunsad ng mas masisinsin at
malalaking pagsasanay-militar ng US sa Pilipinas, kabilang ang Balikatan
2023. Noong 2022, inianunsyo ng AFP na magkakaroon ng 469 na iba’t
ibang pagsasanay at aktibidad militar ang US sa bansa para sa taong
2023. Mas mataas ito sa 461 na mga operasyong militar ng US sa 2022 at
353 nooong 2021.
Ang mga pagsasanay na lakip dito ay bahagi ng
opensibong militar ng US para udyukan ang China. Kasabay at karugtong
ang mga ito sa libu-libo pang pagsasanay sa digma (war exercises) na
inilulunsad ng US sa rehiyon.
Bagamat sa Abril pa idadaos ang
ika-38 serye ng Balikatan, ang taunang “pagsasanay-militar” sa pagitan
ng mga armadong hukbo ng US at Pilipinas, nasa Pilipinas na ang mga
pwersang Amerikano. Noong Pebrero 20, inilunsad ng US at Philippine Army
ang Warfighting Functions Exchange, isang 3-araw na kumperensya bilang
paghahanda sa pagdaraos Salaknib 2023, ang dalawang-seryeng pagsasanay
na ilulunsad bago at pagkatapos ng Balikatan. Lalahukan ang pagsasanay
na ito ng 3,000 tropa mula sa 25th ID ng US at 5th ID, 7th ID at 1st
Brigade Combat Team ng Pilipinas. Magsisimula ang Salaknib sa Marso 5,
at tatagal ng 20 araw.
Samantala, lalahukan ang Balikatan 2023 ng
16,000 tropa, pinakamarami sa kasaysayan nito. Idadaos ang mga
pagsasanay sa Ilocos Norte, at Batanes, Fuga at Calayan — mga islang
dikit sa Taiwan Strait.
Hindi lamang ang US ang gumagamit sa
Pilipinas bilang lunsaran ng digma. Noong Pebrero 20, binuksan ng AFP at
Australian Defense Force ang Philippine-Australia Army-to-Army Exercise
23-1 sa Camp Siongco, Awang, Datu Odin Sinsuat, Maguindanao del Norte.
Katulad ng US, may visiting forces agreement ang Pilipinas at Australia.
Nakatakda ring pumirma ang Japan at Pilipinas ng katulad na kasunduan
para sa malayang paglabas-masok naman ng mga tropang Japanese sa bansa.
Parehong alyado ng US ang Australia at Japan sa panunulsol nito ng gera
laban sa China.
Higit sa mga pagsasanay, muli na ring ilulunsad
ang mga magkasanib na pagpapatrulya ng US at Pilipians sa South China
Sea. Direkta nitong isasangkot ang mga tropang Pilipino sa
pakikipaggiriian nito sa mga barko at pwersa ng China.
Mapanganib ng plantang nukleyar
Isa
sa itinulak ni US Vice Presidente Harris nang bumista siya sa bansa ang
pagtatayo ng US ng mga plantang nukleyar sa tabing ng paglutas ng
krisis ng enerhiya ng Pilipinas. Sa ilalim ng “123 Agreement
Negotiations for Civil Nuclear Energy Cooperation,” itatayo sa bansa ang
mga plantang nukleyar (small modular reactor) na pinaunlad ng US Army
at sinubok sa mga base militar nito.
Nitong Pebrero, ibinunyag ng
Pangasinan People’s Strike for the Environment ang pagraratsada ng
lokal na gubyerno para sa pagtatayo ng anim na mga plantang nukleyar,
lahat sa Labrador, Pangasinan. Nakaharap ang bayan na ito sa Lingayen
Gulf, isa sa pinakamayamang pangisdaan sa bansa.
Babala ng mga
kinatawan ng Makabayan, dalawang gamit ang teknolohiyang ipapasok ng US
sa bansa — sibil at militar. Maraming aspeto ng programang nukleyar ng
US ay napakadaling gamitin para sa gera, kahit ang mga kunwa’y para sa
mga gamit sibilyan.
Katunayan, pinauunlad ngayon ng US ang
Project Pele na naglalayong maglatag ng mga “mobile nuclear power plant”
o “battlefield nuke reactors” na bahagi ng paghahanda nito ng “teatro
ng digma” sa rehiyon ng Asia. Lalabas na gagamitin ng US ang Pilipinas
bilang laboratoryo ng proyektong ito, na nasa antas eksperimento pa
lamang.
Kagyat at kinakailangang pagtutol
Sa kasalukuyan,
papalaki ang posibilidad ng paggamit ng armas nukleyar sa gerang
itinulak ng US at NATO sa Ukraine, sa Korean Peninsula, Taiwan Straits
at South China Sea. Sa gayon, lalong nagiging kagyat ang
pangangailangang hadlangan ito ng mamamayan.
“Itinutulak ng
papalaking banta ng gerang nukleyar ang lahat ng nagmamahal ng
kapayapaan sa buong mundo na pigilan ang paglaki ng posibilidad nito,”
ayon kay Prof. Simbulan. “Pigilan natin ang mga probokasyong ginagawa ng
US, gayundin ang mga operasyong militar ng China, na maaaring sumiklab
sa isang dambuhalang gera para sa kapangyarihan.”
CPP/NPA/NDF Website
Article links:
PROTECTION AND PROMOTION OF HUMAN RIGHTS
------------------------------------------------------------
-----------------------------
0 comments:
Post a Comment